स्मृती, संस्कार आणि संसदीय कार्याचा भावस्पर्शी दस्तऐवज
लातूर (विशेष प्रतिनिधी)
राजकारणाच्या गजबजाटातही माणुसकी, संस्कार आणि नात्यांची ऊब जपणाऱ्या व्यक्तिमत्त्वावर लिहिलेले “देवघरातील देव : शिवराज पाटील चाकूरकर” हे पुस्तक आज अत्यंत भावनिक आणि सुसंस्कृत वातावरणात प्रकाशित झाले. देवघर या पवित्र आणि स्मृतिमय स्थळी, भाजपा नेत्या व लातूर महानगरपालिका निवडणूक प्रभारी डॉ. अर्चनाताई पाटील चाकूरकर तसेच उद्योजक श्री. शैलेश पाटील चाकूरकर यांच्या शुभहस्ते या ग्रंथाचे प्रकाशन संपन्न झाले.
हे पुस्तक लातूरचे माजी खासदार, संसद रत्न सन्मानित प्रा. डॉ. ॲड. सुनील वत्सला बळीराम गायकवाड यांनी लिहिले असून, ते केवळ एक चरित्र नसून शिवराज पाटील चाकूरकर यांच्याशी जोडलेल्या आठवणी, नात्यांतील आपुलकी, संघर्षाची जाणीव आणि संसदेत त्यांनी केलेल्या लोकहितकारी कार्याचा सखोल, प्रामाणिक आणि भावनिक लेखाजोखा आहे.
लेखकाने आपल्या लेखणीतून केवळ संसदीय कामगिरी मांडलेली नाही, तर शिवराज पाटील चाकूरकर यांचे संवेदनशील मन, मूल्यनिष्ठ राजकारण, सामान्य माणसाशी असलेली नाळ आणि देवघरासारख्या पवित्र स्थळाशी जोडलेली त्यांची आत्मिक ओळख अत्यंत प्रभावी शब्दांत उलगडली आहे. त्यामुळे हा ग्रंथ वाचकांना केवळ माहिती देत नाही, तर अंतर्मुख करतो.
या प्रकाशनप्रसंगी डॉ. अर्चनाताई पाटील चाकूरकर, श्री. शैलेश पाटील चाकूरकर तसेच सुप्रीम कोर्टच्या ॲड. रुद्राली पाटील चाकूरकर यांनी ग्रंथाचे मनापासून कौतुक करत समाधान व्यक्त केले.
“हा ग्रंथ म्हणजे स्मृतींचा सुगंध, कार्याचा गौरव आणि पुढील पिढीसाठी प्रेरणादायी दीपस्तंभ आहे,” अशा भावना यावेळी व्यक्त करण्यात आल्या.
“देवघरातील देव : शिवराज पाटील चाकूरकर” हा ग्रंथ राजकीय चरित्राच्या चौकटीपलीकडे जाऊन संस्कार, नातेसंबंध, सेवाभाव आणि लोकशाही मूल्यांचा साहित्यिक उत्सव ठरतो.
लातूरच्या सामाजिक-राजकीय इतिहासात हा ग्रंथ एक भावनिक, सुसंस्कृत आणि प्रेरणादायी दस्तऐवज म्हणून निश्चितच अढळ स्थान मिळवेल.याप्रसंगी लेखक डॉ सुनील सुनील बळीराम गायकवाड,शैलेश पाटील चाकुरकर ,डॉ अर्चनाताई पाटील चाकूरकर,एडवोकेट रुद्राली पाटील चाकूरकर,एडवोकेट ऋषिका शैलेश पाटील चाकूरकर,वैशाली कलबुर्गी अमेरिका आदी मान्यवर उपस्थित होते.